س : ليه بنلف وندُور و نزوّغ ونهرب م الحقيقة؟ ج : عشان احنا ارانب عايشين فى مجتمع ارانب

ياجماعة احنا عندنا مشكلة فظيعة بجد .. لازم على الاقل كل واحد فينا ولو بينه وبين نفسه يكون عنده شجاعة الاعتراف بها .. وهى اننا اصبحنا جبناء لدرجة الخوف من كوننا مسلمين ، وأن بعضنا يعتبر الاسلام تهمة ينكرها ، والبعد عنه شرف يحاول ان يدعيه .. وعلى فكرة هذا الكلام ليس له علاقة مباشرة بما قاله بابا الفاتيكان مؤخرا عندما قال ان الاسلام دين قام على العنف وانتشر بالسيف ، ولا بما قاله الرئيس المؤمن بوش قبله عندما وصفنا بالفاشية .. وعلى فكرة برضه كلمة المؤمن التى وصفته بها ليست على سبيل التريقة او السخرية ، ولا اقصد من ورائها اى اشارة الى الرئيس الراحل انور السادات – الأونر بتاع اللقب - لكن واضح جدا ان البابا وتابعه بوش – بصراحة انا مش متأكد مين اللى تابع لمين - مؤمنان – حقيقى - بما يفعلان ، ومقتنعان بانهما يخوضان حربا صليبية مقدسة ضد فاشيين مسلمين - اللى هم احنا يعنىكشعوب عربية بما فينا المسيحيين بتوعنا - وهذا الكلام ليس جديدا ، وكل الناس عارفين ان الاسلام تم اعتباره مرادفا للارهاب من وجهة النظر الامريكية والانجليزية قبل و بعد 11 سبتمبر .. طيب ، وبعدين ؟
ابدا ، القصة وما فيها ان الخوف اللى مالينا جعلنا نستسلم للمفهوم الفاتيكانى الامريكانى الآخذ فى الانتشار ، واصبح كل منا يبحث لنفسه عن دليل براءة من الاسلام والمسلمين .. وساعد على ذلك حالة الهبل التى يمكن ان تستنتجها من تصريحات بعض قيادات الجماعات المحظورة .. فمرة واحد يشتم فى البلد اللى خيرها عليه ، ومرة يقولك احنا عندنا جيوش وميليشيات ، والمشكلة ان فيه ناس بتصدق ، لان معندناش حد مسئول يرد ، معندناش مسئول اتعلم السياسة فى اى مدرسة او حتى معهد سنتين .. مفيش حد عنده فكر او مبدأ او وجهة نظر هو مؤمن بيها ومتبنيها وبيدافع عنها .. لكن كل اللى عندنا تلامذه .. هواه ، ليس فيهم سياسى محترف ، عشان كده تلاقى الوزير من دول وهو فى المنصب بيتكلم كما لو كان النظام جوز خالته ، وبعد الاستغناء عن خدماته تلاقيه اول واحد بيشتم فى ام النظام ، وكأن الذى كان يتكلم بالامس واحد تانى خالص ، والادلة على ان الناس دى مش فاهمة اى حاجة كثيرة ، منها على سبيل المثال لا الحصر مجموعة النواب الذين وقفوا ضد تعديل قانون حبس الصحفيين ثم غيروا كلامهم فى ثانية بمكالمة تليفون ، واظن اننا لم ننس بعد قصة الوزير الذى انتظر ان يتدخل رئيس الجمهورية لحل مشكلة تلميذة كتبت موضوع انشاء ، لانه ببساطة كان خايف ومش عارف ايه القرار المناسب فى هذا الظرف "العبيط" فما بالك بالظروف الصعبة التى تحتاج الى مسئولين حكماء وخبراء ، او على الاقل فاهمين . .
والمعنى .. اننا اصبحنا نعيش فى مجتمع ارانب .. كل من فيه يحلمون بالجزرة ويخافون العصا التى يعلوها الصليب فى يد البابا وابنه بوش .. والحقيقة ان كلا منهما كان واضحا وجريئا فى اعلان موقفه من الاسلام والمسلمين ، واعتقد ان البابا عندما قال ما قاله كان متأكدا من ان احدا لن يجرؤ على ان يقول له عيب ، خصوصا ان رد الفعل الاسلامى والعربى تجاه بوش لما وصفنا بالفاشية ، لم يكن قويا او مؤثرا ولذلك اعتقد ان البابا فوجىء عندما وجد من يطالبه بالاعتذار عن سخافاته .. يمكن كان اكتر حاجة يتوقعها ان شعبان عبد الرحيم وشاعره اسلام خليل يجهزان لاغنية يردان بها عليه بعد ان اصبح شعبولا هو صوت العرب ، وحلت اغانيه محل اغانى عبد الحليم فى الستينات والشيخ امام فى السبعينيات .. وهنا لا يفوتنى ان الفت نظر حضرتك الى المقارنة بين الاسماء السابقة لتعرف الفرق بين ما كان وما هو كائن على اعتبار ان الفن كما يقولون مرآة الشعوب ولسان حالها ..
الحرب - اذن - على الاسلام .. الاسلام هو المقصود ، الغريب بقى ان كلنا عارفين هذا الكلام مثلما قلت لحضرتك من شوية ، والاغرب أننا نردده فى كل يوم الف الف مرة ، بيننا وبين بعض ،فى الموبايل وعلى القهوة وفى النادى واثناء خطبة الجمعة.. لكن عندما نتكلم بشكل رسمى تجدنا نلف وندور ونهرب ونزوغ من الحقيقة ، وانا بجد مش قادر افهم هذا التناقض الذى نعيش فيه ؟
يعنى يا جماعة انتم مسلمون ولا لأ ؟
مؤمنون بالقرآن ولا لأ ؟
طيب .. ربنا قال : ( ولـن تـرضـى عـنك اليهود ولا النصارى حتى تتبع ملتهم قل ان هدى اللّه هو الهدى ولئن اتبعت اهواءهم بعد الذى جاءك من العلم ما لك من اللّه من ولى ولانصير ).
.. وانا بصراحة خايف لنكون احنا المقصودين .. لاننا على ما يبدو اتبعنا اهواءهم ، واهواء الذين اتبعوا اهواءهم ، وبالتالى نستاهل اللى بيتعمل فينا ، اللهم الا اذا بطلنا خوف ، واتحمقنا على دينا اللى البابا وابنه الرئيس المؤمن بوش عايز يطلعه ، ولازم يكون فيه راجل فى المؤسسة الدينية الرسمية فى مصر يملك شجاعة التفسير الدينى لما نحن فيه .. ويقول لنا بصراحة ماذا قال الله فى هذه الظروف .. ماذا يجب علينا ان نفعل حتى يأتينا نصر الله .. وفرج الله ،
يا جماعة صدقونى احنا محتاجين نكون قريبين من ربنا الايام دى اكتر من اى وقت .. يمكن نقدر نعمل حاجة ، لان خلوا بالكم الراجل البابا ده ممكن تحت تأثير الضغوط يعتذر عادى جدا ، لكن اللى فى القلب فى القلب .. وبعدين ميصحش ابدا ان العالم كله النهاردة يكون بيحاربنا –كمسلمين- حروبا عنصرية دينية ، ونفضل احنا نقول علمانية ، مش وقته خالص والله ، انا شخصيا اختلف كثيرا مع فكر وتاريخ ومستقبل الاخوان كجماعة وهى محظورة او بعدما يرفعوا عنها الحظر ، ارفض الاخوان ، لكن انا فى الاول وفى الاخر مسلم ، وشايف ان الاسلام فى خطر ومش عارف اعمل ايه وعايز راجل مسئول فى الازهر يقول لى اتصرف ازاى .. فيها حاجة دى ؟!

يااااااااااااااااااااااااااااااااااه نسيت اقولك : كل سنة وانت طيب